Kreu demokrat Basha ishte në Mallakastër, atje qe planifikuar një prej rezistencave për të mos e dorëzuar Bashkinë, por që pa rezultat. Duke deklamuar me forcë, sipas tij paligjshmërinë e 30 Qershorit, kryeopozitari u përbetua për përgjegjësi ligjore me ardhjen e tij në pushtet.
“Kushdo që ka shkelur Kushtetutën dhe ligjin pas dekretit të 10 qershorit do të ndëshkohet. Mos harroni, duke nisur nga data 11 qershor çdo qindarkë e taksave të shqiptarëve që është harxhuar për procesin kriminal dhe fals të 30 qershorit, është dëm ekonomik. Për çdokënd që ka konsumuar veprën penale të shpërdorimit të detyrës, ligji është i qartë. Ju siguroj që me qeverisjen e re dhe prokurorinë e çlirurar nga kapja, gjithsecili prej tyre do të marre atë që meriton para ligjit”, u shpreh Basha.
E në situatën kur PD ka dorëzuar gjithë pushtetin lokal nga bojkoti, njëherësh duke mos lëvizur nga kushti “zgjedhje pa Ramën kryeministër”, Basha tha se i takon popullit tashmë të veprojë.
“Popullit sovran i lind e drejta t’i përgjigjet këtij pushteti me të njëjtat mënyra dhe të mbrojë me të njëjtat mënyra kushtetutën dhe ligjin, në Mallakastër, në Fier, në Durrës, në Elbasan, në të gjithë Shqipërinë, por mbi të gjitha në Tiranë, atje ku paligjshmëria ka hedhur rrënjët, atje ku hajdutëria dhe kriminaliteti janë ngritur në fron.
Atje, popullit sovran, nëse nuk i hapet rrugë zgjidhjes politike, zgjidhjes që çdo vend tjetër i rajonit e ka patur në kushte akoma më të lehta sesa kriza e sotme shqiptare, një qeverie tranzitore dhe zgjedhjeve të parakohshme, atëhere popullit sovran i lind e drejta ta marrë në dorën e vet zgjidhjen, me të gjitha format, mjetet dhe mënyrat që i gjykon të përshtatshme për të rivendosur demokracinë dhe drejtësinë”, theksoi Basha. /tesheshi.com/
