Në një fjalëmbajtje para një grup familjarësh të të ish-përndjekurve politikë, aty te çadra e protestës, kreu i opozitës Basha u premtoi atyre dëmshpërblim moral e material kur PD të rikthehet në pushtet.
“Për 26 vite shoqëria jonë nuk ka arritur ta lajë borxhin moral ndaj të përndjekurve politikë. Ne kemi bërë shumë në këtë drejtim, por e dimë që shumë ka mbetur pa u bërë, dhe u zotohem të përndjekurve politikë, se Republika e re që po ndërtojmë do të jetë e lirisë vetëm kur të shlyhet borxhi moral e material ndaj të përndjekurve politikë. Ky është premtimi im. Dy rrugë ka, ose tërheqja e popullit ose largimi i qeverisë,” tha Basha.
Sipas tij, protesta çdo ditë që po vjen po bëhet më e madhe dhe po merr akoma më shumë përkrahje.
Nga ana tjetër, kryeministri Rama e ka ftuar opozitën që kthehet në Kuvend, të votojë Vetingun, dhe më pas të vijojë protestën e saj pa asnjë problem. /tesheshi.com/
