Kreu i Partisë Demokratike Lulzim Basha deklaroi se nesër opozita do të ketë një “betejë” të fortë politike për të detyruar Parlamentin të çojë në Gjykatën Kushtetuese deputetët e mazhorancës që kanë shkelur ligjin dhe janë në konflikt interesi.
Sipas tij, dhunimi i rendit kushtetues, rënia e rendit kushtetues do të thotë që vendi është në xhungël, që nuk ka më dallim midis policit dhe banditit, midis kryeministrit dhe kriminelit dhe anasjelltas.
“E nesërmja është një rast tjetër për t’i dhënë fund këtij dhunimi kaq të hapur, kaq flagrant të rendit kushtetues dhe për të rikthyer vendin në kushtet, të paktën formalisht, të kushtetutshmërisë dhe jo në kushtet e xhunglës”, – tha kryedemokrati.
Në fjalën e tij ai bëri me dije se nesër do të insistohet fort në zbatimin e vendimit të Gjykatës Kushtetuese, i cili në këtë rast ka të bëjë pikërisht me korrupsionin, ka të bëjë me pretendimet se dy anëtarë të tjerë të maxhorancës, përtej Koço Kokëdhimës që shkoi atje ku duhet të shkonte, kanë përfituar shuma të mëdha parash dhe asete publike në kushtet e konfliktit të interesit. /tesheshi.com/
