Aleatët e vegjël të PD-së do të takohen sot me Bashën për të sqaruar dështimin e negociatave të mbrëmshme. A janë ata një hap larg “braktisjes” së çadrës për t’u futur në zgjedhje si “opozita e re”?! Të paktën dy prej tyre po….
“Unë si Dashamir Shehi them se duhet ta votojmë vettingun. Në mënyrë që t’ia heqim nga dora kryeministrit këtë armë, sepse ngeli vettingu, vettingu. Edhe për një rrugë që është me gropa e ka fajin vettingu. Çadra është një projeksion parazgjedhor dhe shumë shpejt do të mbyllet”- kështu deklaroi Dashamir Shehi, kreu i LZHK-së disa orë para bisedimeve të së martës në mbrëmje ku kreu i PD-së, Lulzim Basha, vendosi të mos pranonte ofertën e ndërkombëtarëve.
Ky i fundit nuk pranoi tek ndërkombëtarët që do ta votonte Vetingun dhe e mori vendimin pa i pyetur aleatët, akt që te ata duket se ka përcjellë pakënaqsi nga vendimi ekstrem i PD-së pasi i lë jashtë zgjedhjeve të 18 qershorit. Në këtë kushte, Shehi, një politikan i djathtë dhe me një mbështetje të konsiderueshme kryesisht në Tiranë, duket se nuk ka më një arsye pse të rrijë me Bashën në çadër.
Nga ana tjetër është Agron Duka, ish-ministër i qeverisë së majtë të Fatos Nanos, një njeri me ndikim të zonën e Durrësit, i cili ka marrë në drejtim Partinë Agrare Ambjentaliste dhe është futur në aleancë me PD-në. Për ironi të fatit partia e Dukës figuron e regjistruar në KQZ, si një veprim i zgjuar juridik i tij apo si një gabim, para se opozita të merrte vendimin për të mos u futur në zgjedhje. Pra Duka e ka shumë të lehtë të ndahet nga Basha pas këtij momenti dhe të futet në zgjedhje. Burime nga PAA-ja thanë për tesheshi.com se Duka ka një presion të madh brenda partisë për të hyrë në zgjedhje, pasi kandidatët e tij, shumica biznesmenë kanë nisur fushatën me kohë për zgjedhjet e 18 qershorit.
I pyetur sot nga Koha Jonë, Agron Duka tregon se nuk është i kënaqur me atë që ndodhi mbrëmë. “Sot do të takohemi me zotin Basha dhe do të diskutojmë mbi zhvillimet e djeshme. Propozimet e ndërkombetarëve ishin deri diku lehtësuese për opozitën, por qeveria teknike që ishte kërkesa, e cila na bashkoi në protestë, nuk u hodh në tryezë. Të negociosh do të thotë se të dya palët duhet të cedojnë diçka. Marrëdhëniet tona me ndërkombëtarët nuk janë të cënuar pasi ata erdhën për të dhënë një kontribut dhe jo ultimatume. Sikurse mund të pritej, krizën tani duhet ta zgjidhim ne. Duhet të tregojmë pjekurinë politike. Tani duhet të dominojë arsyeja, pasi nëse nuk gjejmë një zgjidhje nuk dimë se ku mund te shkojnë ngjarjet”- është shprehur ai.
Të vetmit aleatë besnikë që nuk ka shprehur akoma rezerva ndaj Bashës është Nard Ndoka i PDK-së, kreu i PR-së, Fatmir Mediu dhe ai i PBDNJ-së, Vangjel Dule. /tesheshi.com/
