Kreu i PD-së, Lulzim Basha, ka sulmuar sërish me ashpërsi LSI-në. Duke folur në Top Story përballë gazetarit Sokol Balla, Basha e quajti partinë e Metës si e dhënë pas matrapazllëqeve.
“Kush është me LSI le të rrijë me LSI, por LSI kudo qeveris me klientelizëm, si rasti në Shkodër ku kërkonin teserën e partisë për të dhënë hipotekën e gjyshit. Matrapazllëqet kanë marrë fund”, tha Basha.
Basha gjithashtu ka mbrojtur listën e kandidatëve të PD-së, më e përfolura këto ditë, duke thënë se ajo ka gjetur përkrahje.
“Lista është përshëndetur dhe është pritur me entizuazëm të jashtëzakonshëm, jo vetëm nga partia, por edhe nga publiku, akademikët, shoqëria civile dhe media. Të të jap disa shifra sesa i thellë është ndryshimi, kemi 41 gra në 140 kandidatë, 82 përqind e kandidatëve që nuk kanë qenë kurrë deputetë, 42 përqind të rinj nën 40 vjeç dhe 33 përqind nën moshën 35 vjeç. Kjo është një listë që përfaqëson dëshirën, kërkesën e kohës dhe qytetarëve për daljen e PD me një ekip të lirë dhe demokrat”, shtoi kreu i selisë blu.
Ai foli dhe për marrëveshjen me Ramën, duke e cilësuar atë si një rrëzim të republikës së vjetër.
“Marrëveshja parashikon fundin e republikës së vjetër, reforma kushtetuese, ajo zgjedhore, përfshirë votimin elektronik dhe biometrik nuk janë asgjë më pak se katapultimi i republikës së re. Me reformën kushtetuese do t’i japim fund pazarit politik që është luajtur në kurriz të shqiptarëve. Rama është detyruar të pranojë ndryshimet kushtetuese dhe rënien e republikës së vjetër përmes rrugës institucionale dhe jo përmes revoltës së popullit”, shtoi Basha. /tesheshi.com/
