Gjatë një ndalese në Shkodër në funksion të moblizimit të elektoratit për protestën e 18 shkurtit, kreu i PD-së Lulzim Basha ftoi njerëzit rreth e rrotull tij që të bashkohen për të reaguar ndaj qeverisë.
“Diçka e madhe po ndodh në Shqipëri, diçka e madhe po ndodh anembanë vendit tonë. Njerëzit po refuzojnë dëshpërimin, njerëzit po refuzojnë të keqen, njerëzit kanë vendosur të bashkohen dhe unë dhe Partia Demokratike do t’i prijmë këtij bashkimi më 18 shkurt”, tha Basha.
“Le t’u themi shqiptarëve se frika ka vdekur këtu në Shkodër dhe se kurajoja qytetare do marrë në dorë fatet e zgjedhjeve të lira dhe të ndershme, fatin e Shqipërisë, fatet e çdo shqiptari duke nisur nga bashkimi i madh të shtunën më datë 18 Shkurt në Tiranë”, theksoi kreu demokrat, ku, duke përfituar nga prezenca e të rinjve në tubimin e tij, u përmendi atyre sërish stazhin, si pjesë e një projekti që u siguron atyre punësim.
Kujtojmë që stazhi ishte një praktikë e kohës së komunzimit, ku të rinjtë që sapo mbarronin shkollën, shkonin e mësonin të punonin në gjirin e klasës punëtore. Ose ndryshe ishte dhe stazhi i partisë, ku aspirantët për t’u bërë komunistë, po ashtu shkonin në gjirin e klasës punëtore. /tesheshi.com/
