Kreu demokrat Lulzim Basha mbërriti në Sarandë këtë mëngjes, ku tha se dielli i këtij qyteti ishte me nam kudo në botë, por për ironi, e thënë kjo, në një ditë të vrenjtur.
“Dua ta ndaj me ju dhe me të gjithë shqiptarët kudo që janë, se dielli i Sarandës që është me nam tashmë në të gjithë Europën dhe të gjithë botën, 300 ditë diell, nuk do të jenë thjesht fakt i natyrës. Me votën e Sarandës për ndryshim ato do të sjellin 300 ditë prosperitet, ekonomi dhe mirëqenie.
Madje dhe këto re e ndoshta dhe disa pika shiu të cilat do të ujisin kopshtet e sarandiotëve, do të ujisin tokat e tyre që agrumet e tyre, frutat dhe perimet të rriten në mënyrë që sezoni i ardhshëm turistik ta gjejë këtë Sarandë ndryshe, plot me shpresë, me mundësi për çdo familje dhe çdo familjar, për çdo të rinj dhe çdo të re”, tha Basha nën entuziazmin militant që e rrethonte ndërsa ai fliste mbi kofanon e një makine të posaçme për këtë qëllim.
Basha shtoi se prej aty, në Sarandë e deri në në Tropojë, “nga jugu në veri, ndiej entuziazmin tuaj, entuziazmin e nënave për fëmijët e tyre, dëshirën për ndryshim të rinis që kërkon Shqipërinë anëtare të Bashkimit Europian, dëshirën për ndryshim të papunëve që presin dhe meritojnë punë”, theksoi kreu i opozitës. /tesheshi.com/
