Kthimi i Bashës nga Berlini ka rezervuar një tjetër gjuhë të ashpër të tij karshi kreut të qeverisë Rama, ku me “krimin” në gojë, ai ka huazuar dhe një fjalë të harruar nga vokabulari akuzues i Berishës, “malavita”-n, gjithnjë në adresë të Ramës. Por gjithashtu dhe fjalën tjetër, atë “lavatriçe”, duke u kthyer në kohën kur Rama drejtonte Bashkinë e Tiranës. Dhe në lumin e akuzave, Basha ka shkuar deri aty sa dhe marrjen e drejtimit të PS-së nga Rama, t’ja atribuon anës kriminale të pretenduar të Ramës.
“Me paratë e krimit dhe të korrupsionit të lejeve të ndërtimit Edi Rama bleu drejtimin e Partisë Socialiste.
Në krye të PS-së dhe të opozitës, Edi Rama bashkëpunimin me krimin e ktheu në një model politik. Ai rekrutoi që në opozitë figura të krimit dhe të malavitës kudo në Shqipëri dhe krijoi një aleancë të fuqishme PS-krim me anë të së cilës ai mori pushtetin politik në vitin 2013.
Lidhjet e Edi Ramës me krimin janë shumë më të hershme se sa kur u bë kryeministër. Këto lidhje kanë filluar që në kohën kur ishte kryebashkiak i Tiranës dhe e ktheu qytetin në një lavatrice gjigande ku u pastruan për vite paratë e trafiqeve dhe të krimit”, kanë qenë këto disa prej deklarimeve të Bashës. /tesheshi.com/
