Basha kaloi këtë të premte provën e vështirë në prëzantimin e të birit të Fahri Balliut, Klevis Balliu, si kandidat për deputet në Pogradec.
Basha e quajti atë student të shkëlqyer të Londrës, duke u përbetuar se ai nuk do i zhgënjejë. “Krenohuni më bijtë dhe bijat që keni nxjerrë, ja ku e keni Klevis Balliun”, iu drejtua Basha turmës së demokratëve.
Klevis Balliu ishte ndër befasitë e listës Basha për kandidatë, krahas fshirjes që aty të emrave me peshë në PD si Jozefina Topalli, Astrit Patozi, Majlinda Bregu dhe Eduart Selami.
Për këtë arsye, strukturat e demokratëve të zonës e kanë pritur ftohtë këtë ditë, të birin e gazetarit të flaktë të së djathtës, ardhur nga Zëri i Popullit.
Klevis Balliu nuk njihej fare në opinion, deri kur u mësua se Presidenti Nishani e kishte punësuar si këshilltar të tij. Ai u aktivizua gjatë javëve të çadrës duke dalë hapur në mbrojtje të saj, edhe pse me statusin e këshilltarit të kreut të shtetit.
Me gjasë ai do zgjidhet deputet, për shkak të renditjes në listë, duke arritur atë që nuk mundi ta arrijë i ati vite më parë, Fahriu, kur humbi përballë Valentina Leskajt në Elbasan. /tesheshi.com/
