Estref Halili ishte riu nga Kolonja e Fierit i cili dy vjet më parë u vetëvar në qelitë e burgut pasi ishte dënuar për një cigare hashash. Dhe ky rast është sjellë në vëmendjen e demokratëve gjatë një tubimi partiak të kreut Basha në Fier, në përkujtim të 27-vjetorit të themelimit të PD-së.
“Sot e gjithë qeveria është ngritur në këmbë për të mbrojtur Saimir Tahirin, por askush nga ata nuk u kujtua të thotë një fjalë për Estref Halilin 22-vjeçar. Ky është shteti i Edi Ramës. Estref Halili, për një cigare hashash u plas në burg. 22-vjeçarit iu ndërpre jeta në lulen e rinisë. Ndërsa për Saimir Tahirin dhe fatin e tij, Edi Rama bëhet gjyqtar, bëhet prokuror, vetëm e vetëm që ta shpëtojë nga drejtësia.”
Kryedemokrati bëri thirrje për reagim qytetar ndaj qeverisë Rama, të cilën e quajti dhe klikë kriminale.
“A jemi gati t’i rikthejmë qytetarëve shqiptarë jo vetëm paratë e vjedhura nga kjo klikë kriminale dhe korruptive, por edhe shpresën se e nesërmja duhet dhe do të jetë demokratike, e lirë dhe europiane siç e dëshiron çdo shqiptar? Jam i bindur që po!”, theksoi kreu i selisë blu. /tesheshi.com/
