“Na ka ardhur në majë të hundës. Shkon në Gjermani për të bërë piktura. Mua nuk më hyjnë në punë pikturat e atij, unë dua bukë për të ngrënë. Çmimi i naftës, dritat, uji, tatimet, budalliqet në na është marrë fryma. Në datën 16 o shkoni ta rrëzoni ose mos shkoni hiç”, iu ankua një grua kreut demokrat Basha, gjatë një pranie të këtij të fundit në Burrel.
Prej aty, Basha ftoi gruan në fjalë e të gjithë pjesëmarrësit në tubim, që të shtunën më 16 shkurt të rendin drejt Tiranës për rrëzimin e Ramës.
“Matanë gardhit të policëve është hajduti, këtej populli. Tani është në dorën tuaj. Ne do ta hapim atë derë, se kur ta hapim do të kemi më shumë mundësi t’iu ndihmojmë. Na duhet të hapim atë derë. Të Bashkohemi të gjithë për Shqipërinë si gjithë Europa. Kjo është domethënia e ditës së shtunë, prandaj iu ftoj të gjithëve bashkë”, theksoi Basha.
Kreu i selisë blu po realizon një tur mobilizues në të gjithë Shqipërinë, duke bërë thirrje për pjesëmarrje sa më masive në protestën e 16 shkurtit. /tesheshi.com/
