Kreu i PD-së, Lulzim Basha, jo në çadër por në zyrat e partisë së tij, i është qarë misionit të OSBE-ODIHR-it mbi rrezikun e zgjedhjeve të 18 qershorit në Shqipëri.
Në një takim me pjesëtarë të këtij misioni, Richard Lappin, zëvendëskryetar i Departamentit të Zgjedhjeve, Ana Rusu, këshilltare për zgjedhjet, Alexey Gromov, këshilltar për zgjedhjet, Francesco Pagani, kreu i këshilltarëve politikë në Asamblenë Parlamentare të OSBE, Basha tha se rreziku i zgjedhjeve vjen nga moszbatimi i ligjit të dekriminalizimit, ku sipas tij qeveria vazhdon të ndajë pushtetin me kriminelë dhe banditë të njohur.
Po ashtu lideri i opozitës ka përmendur dhe drogën që sipas tij ka mbuluar vendin. Basha u tha ndër të tjera se qeveria nuk ka reflektuar pas rekomandimeve të fundit të OSBE-ODIHR për zgjedhjet e vitit 2015-ës dhe se Edi Rama ka prishur të gjidha zgjedhjet që janë bërë qysh se ai erdhi në pushtet duke dhunuar votën e lirë, përmes blerjes së saj, apo përmes kërcënimit e dhunës.
Qëndrimi final i Bashës përballë ndërkombëtarëve, ka qenë po ai që përbën dhe kredon e çadrës: qeveri teknike, si garanci për zgjedhje të lira e të ndershme. /tesheshi.com/
