Kreu demokrat Basha ishte në Korçë, në zonën e Dvoranit, ku dëgjoi prej fermerëve ankesat për mosshitjen e prodhimit. Ndodh në vendin prej nga është ministri i Bujqësisë, Niko Peleshi, ku sipas selisë blu, fermerët po vuajnë mungesën e kërkesës për eksport.
“Sivjet nuk ka ardhur një maune me targa të huaja. Më parë vinin shqiptarët e Kosovës, vinin maqedonasit. Tani as edhe një. Nuk e di arsyen përse nuk vijnë”, citohet të ketë thënë një fermer.
Nga ana e tij, Basha e ka parë zgjidhjen e situatës që nga vota, që sipas tij shitet nga ata që sot ankohen.
“Kush shet votën s’duhet të flasë më as për mollën, as për çmim të lartë të pesticideve dhe as për çmim të lartë të naftës, sepse në atë moment ka shitur shpirtin. T’i ndërgjegjësojmë njerëzit se kush shet votën ka shitur të ardhmen e fëmijëve të tyre. E pastaj vijnë të gjithë politikat, vijnë mbështetja e politikave të bujqësisë dhe e subvencioneve, që edhe molla juaj të dalë të paktën në tregun e Kosovës”, deklaroi kreu demokrat. /tesheshi.com/
