Kreu demokrat Basha reagoi i acaruar nga fakti i ndalimit nga policia i 7 personave, mes tyre dhe zyrtarë partiakë demokratë, të cilët një ditë më parë, në Librazhd, duke udhëhequr një turmë militante, tentuan t’i bllokojnë rrugën kryeministrit Rama, e, të bllokuar nga policia qëlluan me vezë eskortën e tij.
“Këto veprime janë reprezalje të hapura ndaj kundërshtarëve dhe qytetarëve që protestojnë kundër regjimit të Edi Ramës. Ato vijnë pas arrestimeve dhe ndalimeve të 500 mbështetësve të opozitës. Mbeten akoma në burg në mënyrë të paligjshme mbi 50 qytetarë. Ky është bilanc regjimesh represive dhe jo të një vendi evropian. Sistemi i drejtësisë është shpartalluar, Parlamenti është shpartalluar. Edi Rama ka vendosur në Shqipëri një pushtet autokratik jashtë Kushtetutës. Pasi vuri në nën kontroll të gjitha pushtetet, tani po i përdor për të ushtruar dhunë ndaj kundërshtarëve. Në këtë aventurë, Edi Rama mbështetet nga Sandër Lleshaj dhe Arta Marku. Ju bëj thirrje policëve dhe prokurorëve që e ndjenë veten pjesë të ligjit që të mos u binte urdhrave të paligjshme të autokratit të inkriminuar, Edi Rama”, u shpreh Basha.
Iu përgjigj ministri i Rendit Sandër Lleshajt, duke i kujtuar se ligji është shkelur pikërisht nga ai dhe partia e tij.
“Lulzim Basha është përgjegjës për çdo individ që aktivizon kundër ligjit dhe lirive politike në vend!
Pengimi i subjekteve zgjedhore dhe përdorimi i lëndëve plasëse, kundër atyre dhe forcave të rendit janë vepra penale. Askush nuk do të tolerohet! Kush u përgjigjet thirrjeve për paligjshmëri, do të përballet me ligjin!”, u shpreh Lleshaj. /tesheshi.com/
