Gjatë një ndalese në Fushë Arrëz, kreu demokrat Basha e përktheu si të suksesshme strategjinë e protestave, djegies së mandateve, e gjithashtu bojkotit të zgjedhjeve, ku sipas tij gjithçka është finalizuar me kalimin e mazhorancës në minorancë.
“Përmes 6 muajsh protestash i kemi dhënë kurojo çdo shqiptari, kemi vetëdijësuar çdo shqiptar dhe sot pas 30 qershorit, nuk janë vetëm sondazhet ato që tregojnë PD dhe aleatët fitues të zgjedhjeve të ardhshme, të lira e të ndershme kurdo që të mbahen ato, por është vetë përmasa e 30 Qershorit.
Janë 85 përqind e shqiptarëve të cilët ushtuan me refuzimin e tyre në 30 qershor, thirrjen kombëtare ‘Rama ik’ dhe vulosën kësisoj aleancën më të madhe politike që ka njohur Shqipëria dhe shqiptarët që nga vitit 1992″, – deklaroi Basha.
“Tani ka ardhur koha ti ofrojmë shqiptarëve rrugëdaljet nga kjo krizë e tmerrshme dhe ta shndërrojmë shumicën 85 përqind ‘Rama ik’, në shumicën e re qeverisëse që do ti prijë transformimit ekonomik dhe politik të vendit”, theksoi kryeopozitari, i cili ka ndërmarrë një tur nëpër Shqipëri, duke e prezantuar 30 Qershorin si fitore të madhe politike. /tesheshi.com/
