Grupi Parlamentar i PD-së do të mblidhet të premten pasdite për të vendosur strategjinë që do të ndjekë në legjislaturën e re të Kuvendit të Shqipërisë.
Më 9 shtator parlamenti mblidhet në seancë konstitutive, në të cilën do të betohen deputetët dhe zgjidhen drejtuesit e Kuvendit, kryetari dhe nënkryetarët. Partia Socialiste ka propozuar Gramoz Ruçin për kryeparlamentar, por PD ka shprehur kritika të forta, duke paralajmëruar zhvillimin e protestave.
Në prag të mbledhjes së Grupit Parlamentar demokrat, në PD ka mbërritur një këshilltar i lartë i CDU-së së kancelares Angela Merkel, i cili ka patur një bashkëbisedim me deputetët e opozitës.
Në bashkëbisedim, diskutimi është fokusuar në lidhje me strategjinë dhe aksionin e PD-së përballë qeverisjes së socialistëve dhe rrugëve për të çuar në pushtet demokratët.
“Në prioritetet kryesore të Partisë Demokratike, renditet reforma e plotë zgjedhore që do të bëjë të mundur garantimin e votës së lirë e të ndershme, asgjesimin e shitblerjes së votës, dhe dhënies fund një herë e mirë të manipulimit të vullnetit të qytetarëve.
Basha theksoi se krahas betejës së përditshme kundër keqqeverisjes, krimit dhe drogës, Partia Demokratike do të konsolidojë alternativën e saj qeverisëse me mbështetjen dhe bashkëpunimin e ngushtë me partitë simotra europiane, e në vecanti me CDU”, thuhet në njoftimin e PD-së. /tesheshi.com/
