Partia Demokratike ka mbledhur grupin e saj parlamentar ku ka përcaktuar strategjinë që do të ndjekë në seancën e së enjtes, por edhe në vazhdimësi. Pas mbledhjes, kreu demokrat Lulzim Basha deklaroi intensifikimin e aksionit opozitar, ndërsa paralajmëroi se askush nuk do të mundet t´i ndalë fjalën opozitës në sallën e Kuvendit.
Kreu i PD-së deklaroi se Shqipëria është i vetmi vend që nuk po i hapen negociatat me BE dhe kjo për shkak të lidhjeve të qeverisë me krimin dhe bandat.
“Jam këtu për sa i përket qëndrimit të PD-së në seancë plenare dhe aktivitetet parlamentar. Kjo në vijim të ngjarjes së shëmtuar të javës së kaluar dhe dy javëve më parë, kur Edi Rama përmes Gramoz Ruçit u mundua të dhunojë rregulloren duke i mbyllur gojën opozitës.Kjo nuk ka për t’u pranuar kurrë dhe nuk do të ndodhë. Ne do të intensifikojmë aktivitetin tonë parlamentar duke rikthyer një praktikë konform rregullores që është ajo e seancës së pyetjeve”, deklaroi kreu i PD-së.
Basha akuzoi Ramën se ka zgjedhur të bëjë kompromis me krimin dhe se është bërë rob i marrëveshjes me oligarkët.
“Do kërkojmë seancë pyetjesh për të vendosur Ramën dhe ministrat e tij para përgjegjësisë, të cilës po mundohet t´i largohet çdo ditë, herë si bahçevan dhe herë si kopshtar. Thotë se ka hapur kopshtin e Pallatit të Brigadave për qytetarët, ndërkohë që në anën tjetër iu rrit taksat”, tha Basha. /tesheshi.com/
