Kreu demokrat Basha ka zgjedhur më në fund që të kundërshtojë Schengenin rajonal, që edhe pse po qartësohet si projekt perëndimor (i yshtur nga Merkel), ai pretendon se është kundër BE-së.
“Shqetësues është fakti se kjo nisëm u propozua pas refuzimit të BE për hapjen e negocitave me Shqipërinë dhe me Maqedoninë e Veriut, sepse lë përshtypjen e krijimit të një blloku të ri ekonomik dhe politik si alternativë apo sfidë ndaj Bashkimit Europian”, shkruan Basha.
Nga ana tjetër, edhe pse nismës po i bashkohet Mali i Zi, Basha e llogarit këtë të fundit si refuzuese.
“Kjo nisëm ka hasur në hezitim jo vetëm prej Kosovës por edhe prej dy vendeve të tjera të Ballkanit Perëndimor, Mali i Zi dhe Bosnja e Hercegovina çka dëshmon se kjo iniciativë rajonale me pjesëmarrje të gjymtuar i ka gjasat e mëdha që të dështojë pa u formuar mirë”, arsyeton njeriu qe drejton opozitën shqiptare.
Është ky një pozicion që e distancon atë nga Meta, edhe pse ndodhen në një llogore politike. Kreu i shtetit qartaz e përkrahu Schengenin – qartazi duke e kuptuar se është projekt perëndimor, në një përpjekje për të mos u acaruar më shumë me ndërkombëtarët – ndërsa Basha zgjedh tjetër rrugë.
“Partia Demokratike, si parti e qendrës së djathtë natyrshëm mbështet tregtinë dhe qarkullimin e lirë të mallrave, shërbimeve, kapitalit dhe krahut të punës, por për ne është e pashpjegueshme nevoja për një nisëm të re rajonale, ndërkohë që për këto qëllime kemi nisma të tjera me synime të ngjashme, siç është CEFTA e cila është dëshmuar tashmë si model i suksesshëm për integrimin rajonal dhe përgatitjen e të gjitha vendeve të Europës Qendrore e Lindore për integrimin në BE”, shkruan Basha.
Sipas tij, Rama duhej të ishte konsultuar më parë me Kosovën para se të hidhte hapin për Schengenin rajonal.
“E konsideroj të papranueshëm moskonsultimin e qeverisë shqiptare me Kosovën për këtë iniciativë dhe bërjen pjesë të saj pa e kushtëzuar paraprakisht pjesëmarrjen e Shqipërisë me praninë e Kosovës.
Këto qëndrime bien ndesh me parimet e partneritetit strategjik për të cilat qeveria e Shqipërisë është zotuar disa herë gjatë mbledhjeve me qeverinë e Kosovës. Ato shkelin hapur marrëveshjen dyshtetërore për unifikimin dhe koordinimin e politikës së jashtme të dy vendeve tona”, pretendon Basha. /tesheshi.com/
