Kryetari i Partisë Demokratike, Lulzim Basha u takua me drejtorin e Zgjerimit në Komisionin Europian, Christian Danielson, me të cilin ngriti disa probleme, që sipas tij përcaktojnë çeljen ose jo të negociatave, për anëtarësimin e Shqipërisë në BE.
“Moszbatimi i ligjit të dekriminalizimit, si provë e mungesës së vullnetit për tu ndarë me krimin dhe për të respektuar sundimin e ligjit është një problem i madh për demokracinë dhe shtetin ligjor. Kthimi i drogës në aktivitetin më të madh prodhues në vend, investimi i krimit të organizuar për të ndërtuar një infrastrukturë të tërë të prodhimit dhe trafikimit të drogës, dhe mosveprimi i shtetit ndaj trafikantëve janë indikacione të rolit nxitës dhe mbrojtës për këtë aktivitet, nga segmentet më të larta shtetërore. Sfida më e madhe sot është garantimi i zgjedhjeve të lira në kushtet kur procesi zgjedhor kërcënohet nga droga me mbeshtetje qeveritare”, theksoi kreu i opozitës.
Basha tha se PD-ja ka dhënë dhe vijon të mbështesë integrimin e Shqipërisë dhe se është e vendosur të kontribuojë për të ardhmen europiane të vendit.
Drejtori i Integrimit në BE, nga ana tjetër vlerësoi rolin dhe kontributin e opozitës për integrimin europian, gjatë qeverisjes së saj, si dhe në arritjen e reformës në drejtësi.
Më herët, drejtori i Zgjerimit në Komisionin Europian, Danielson u takua edhe me kryetarin e Kuvendit, Ilir Meta./tesheshi.com
