Kreu i opozitës Basha e quajti listën demokrate si fituese të zgjedhjeve të 25 prillit, gjatë një dalje para medias për ta komentuar atë.
“Me listën e miratuar dje, PD me aleatët nisi marshimin drejt ndryshimit. Me 25 prill ndryshimi që po vjen s’ka vetëm fytyrën e kandidatëve, por të të gjithë shqiptarëve që duan ndryshimin.
Më 25 prill, ndryshimi ka formën dhe fytyrën e mijëra shqiptarëve me sytë nga Aleanca për Ndryshimin. Kriteret që mishërojnë kandidatët e listës fituese, sfidat e Shqipërisë”, argumentoi Basha.
I pyetur se sa mandate synon, Basha, ndryshe nga Rama që ishte konkret, duke thënë se synon 78 e 88 maksimalisht, pati një tjetër përgjigje.
“Unë dëgjoj dy fjalë: vetëm ‘Rama ik’”, u përgjigj Basha.
Për listën e PS-së, në krye të së cilës është dhe dyshja suprizë Çomo – Bozo, Basha tha se ato janë fasadë e bandave.
Ndërkohë, për Reformën në Drejtësi, të cilët ndërkombëtarët vijojnë ta mbështesin, Basha e quajti atë “të kapur nga Rama”.
“Ajo që kemi vuajtur me Ramën është kapja e drejtësisë nga politika. Rama është shkaku dhe pengesa kryesore e reformës në drejtësi”, tha Basha. /tesheshi.com/
