Kreu demokrat Basha ka përcjellë një mesazh të kamufluar kundërshtues për Reformën në Drejtësi, e jo vetëm duke evidentuar faktin se vërtet vendi ka mbetur prej muajsh pa Gjykatë Kushtetuese, diçka e paprecedentë.
Ai, gjatë një interviste për gazetën “Sllovene Delo”, ka kontestuar atë që po ndodh me reformën e bujshme, e cila ka në qendër procesin e vettingut, e ku pritet të krijohet “i frikshmi” SPAK si tjetër kolonë e saj, duke thënë: “Shqipëria duhet të ndryshojë që nga themeli, që nga organizimi i saj juridik. Drejtësia nuk mund të mbetet më në dëshirat e qeverive”.
“Prej më shumë se një viti vendi s’ka Gjykatë Kushtetuese”, kujton Basha.
Ndërkohë, sa i përket kësaj të fundit, ndërkombëtarët, mbrojtës të rregullt të asaj çfarë po ndodh me reformën, paçka dhe pasojave të saj, janë shprehur se kjo është një gjendje e përkohshme e tejkalueshme.
I pyetur për protestat e opozitës, Basha përcolli bindjen se te to po dominon fryma popullore.
“Rrugët e Shqipërisë janë të mbushura me protestues që kanë vetëm një kërkesë: zgjedhje të parakohshme dhe hetim të krimit të organizuar”, theksoi kreu demokrat. /tesheshi.com/
