Lulzim Basha, lideri i opozitës shqiptare, e ka cilësuar qëndrimin e kryeministrit Edi Rama, në mbledhjen e Task-forcës kundër kanabisit, vetëm një show mediatik.
Në një postim në rrjetet sociale, Basha thekson se Rama jo vetëm që nuk është serioz në aksionin e tij institucional por ka kapur deri tani vetëm kultivuesit e varfër dhe jo bosët e drogës.
Ndërkohë, kreu i PD-së ka sulmuar sërish Fatmir Xhafën, kandidatin më serioz për ministër të Brendshëm në shtator, pasi sipas tij, Xhafa nuk mund të ketë të drejtë morale të drejtojë policinë, ngase thekson Basha “ai është vetë trafikant.
Postimi i plotë i Bashës
“Me seriozitetin tragjiko-komik që e ka pushtuar, Edi Rama shpalli sot para botës një tjetër betejë historike: luftën heroike kundër kanabisit dhe grupeve kriminale të lidhura me drogën. Por, tashmë, dihet se herozimi i vetëm i Ramës është të arrestojë keqbërësit e vegjël, ata që nuk janë aq të mëdhenj sa të kenë lidhje me pushtetin.
Koka e kthimit të Shqipërisë në plantacion kanabisi është Sajmir Tahiri, aq sa edhe partnerët e huaj i vunë ultimatumin Ramës për largimin e tij, si kurrë ndonjëhere. Por ata që presin që aksioni i Ramës të prekë Tahirin do të zhgënjehen. Trafikanti ndoshta më i madh i drogës në Shqipëri është Klement Balili, të cilin e Edi Rama e la të lirë edhe pse e kërkonte qeveria e SHBA-ve, sepse po të fliste Balili rrëzohej gjysma e ministrave. Prandaj, ata që presin që me aksionin e tij Rama të arrestojë Balilin do të zhgënjehen. Një nga trafikantët më të kërkuar të drogës në Evropë është vëllai i Fatmir Xhafës, por ata që presin që aksioni i Ramës ta arrestojë atë do të zhgënjehen, gjithashtu.
Aksioni i Edi Ramës do të arrestojë ca fshatarë të varfër dhe ca kriminelë të vegjël. Kriminelët e vërtetë do të qeverisin vendin së bashku me Ramën. Derisa populli t’i largojë”.
/tesheshi.com/
