Kreu demokrat Basha i është kthyer me një koment të shkurtër incidentit të një nate më parë në Qytetin Studenti, ku recepsionistja e një godine nuk e lejoi të ngjitej në dhoma referuar rregullores. Por për Bashën, ajo morri urdhër nga lart.
“Kur mbërritëm në godinë u takuam me një punonjëse të konviktit, e cila na kërkoi të largoheshim. Kjo porosi erdhi nga lart”, shkruan njeriu nr.1 i opozitës.
“Kjo në fakt është rruga tjetër. Rruga e frikësimit dhe kërcënimit të njerëzve për t’ju mbyllur gojën dhe për t’i mbajtur të nënshtruar e nën kontroll”, vijon të gjykojë ai.
Basha përbetohet se do e vijoi misionin e tij të komunikimit me njerëzit, pa njohur asnjë pengesë.
“Për mua politikanët duhet të jenë shërbëtorë të popullit, jo e kundërta. Prandaj nuk do të lejoj askënd që të më pengojë të dëgjoj problemet e bashkëqyetarëve të mi dhe të përpiqem t’i ndihmoj ata. Kjo është arsyeja pse u bëra pjesë e jetës publike.
Ju bëj thirrje atyre që kanë zgjedhur rrugën e kërcënimeve dhe intimidimeve që t’i vënë gishtin kokës. Askush dhe asgjë nuk do t’i ndalë njerëzit që të dëgjohen dhe ta thonë fjalën e tyre”, përfundon Basha një status të tij, shoqëruar me foton e një bashkëbisedimi me dy studentë. /tesheshi.com/
