Kreu demokrat Basha tha se ai i ka dërguar kryeministrit Rama një plan për daljen nga kriza, siç ai e konsideron se ndodhet vendi, duke iu referuar një propozimi disapikësh për Reformën Zgjedhore. Përndryshe tha Basha, ai(Rama), duhet të hapë kraun, pa sqaruar se si duhet të ndodh kjo(hapja e krahut).
“Kjo nuk është një çështje për Bashën, nuk është një çështje për Ramën. Shqipëria është në krizë, vendi është në krizë. Ne kemi një plan për ta nxjerrë vendin nga kriza. Ne kemi një plan për reformën zgjedhore. Ia kemi dorëzuar këtë plan Edi Ramës dhe përfaqësuesve të tij. Ta marri ta zbatojë, nëse nuk e zbaton dot të hapë krahun se jemi të gatshëm ta zbatojmë ne”, tha Basha.
Por cili është ky plan?
Me gjasë, bëhet fjalë për atë të paraqitur ditë më parë, ku ndër pikat kryesore ishte që në tryezën e reformës të mos kishte përfaqësues të opozitës së re parlamentare, e ku parlamenti quhej monopartiak.
“Opozita e Bashkuar propozon që procesi të drejtohet nga një strukturë e përbërë nga përfaqësues të organizmave ndërkombëtar (OSBE/ODIHR, BE, SHBA, etj.), një përfaqësues i Parlamentit monopartiak dhe një përfaqësues i Opozitës së Bashkuar. Produkti i dakordësuar nga kjo strukturë, pasi i nënshtrohet konsultimit me publikun, nëpërmjet formave dhe metodave që mundësojnë marrjen e mendimit të qytetarëve, miratohet pa ndryshime”, thuhet në një prej pikave të propozimit demokrat, të cilin, deri më tani as ndërkombëtarët nuk e kanë marrë në konsideratë, veç BE-së, e cila e ka rëzuar si propozim.
Ky qëndrim i Bashës vjen një ditë pasi Rama tha se ishte i gatshëm që të dëgjonte nga opozita çfarë ajo kërkonte në kuadër të Reformës Zgjedhore, madje duke shkuar dhe në selinë e saj, pra në SHQUP, porse kushte mazhorancës nuk mund t’i vendoseshin. “Kush vendos kushte, do dalë i humbur”, tha Rama. /tesheshi.com/
