Kreu i opozitës, Lulzim Basha tregoi nga çadra në bulevard atë që për shumë analistë mbetet mister, çfarë do të bëjë opozita tani që janë mbyllur afatet e regjistrimit në zgjedhje, thjesht bojkot të 18 qershorit. Sipas Bashës, opozita planifikon mosbindje civile për të bërë të pamundur qeverisjen pas 18 qershorit.
Basha tha se aksioni nis të dielën në Kavajë dhe do të shtrihet më pas në të gjithë Shqipërinë deri më 18 qershor.
“Sot do të planifikojmë në detaje bashkimin për të dielën e ardhshme me 7 maj në Kavajë për të çliruar me forcën e bashkimit Kavajën nga krimi, droga dhe zgjedhjet fasadë. Prej ditës së hënë dhe tutje do ta shtrijmë anembanë Shqipërisë mosbindjen civile dhe lëvizjen e madhe popullore për zgjedhje të lira dhe të ndershme për të kulmuar me 18 qershor”, tha Basha.
Në mesazhin e radhës për kryeministrin Rama, u vune re tone kërcënimi. “Nuk e di si i ke bërë planet Edi Rama dhe ku po të çon pushka kriminale ku ke hipur nga e cila refuzon të zbresësh, po çfarëdo të kesh planifikuar me 18 qershor, të jap fjalën se nuk do qeverisësh asnjë orë të vetme pas 18 qershorit. Ke vetëm një rrugë: Bëhu pjesë e zgjidhjes ose shporru!”, tha Basha.
Kreu i opozitës sulmoi edhe KQZ, duke e cilësuar një instrument partizan, antiligjor. Basha tha se asnjë parti apo deputet nuk është regjistruar në KQZ brenda afateve ligjore të përcaktuara. Dhe në këtë kontekst, zgjedhjet e 18 qershorit formalisht dhe ligjërisht janë të pavlefshme. /tesheshi.com/
