Partia Demokratike vendos kushte për të qëndruar në Kuvend, ndryshe kërcënon me bojkot.
Grupi parlamentar i opozitës ka vendosur që mazhoranca të zbatojë menjëherë ligjin e dekriminalizimit, pra të largojë deputetët me problem penale, të largojë deputetët që kanë konflikt interesi, si dhe të mos duket në asnjë komision deputeti i arrestuar së fundi, e liruar më vonë, Armando Prenga.
“Gjakosësit e shqiptarëve e kanë vendin në qeli dhe jo në Parlament”, deklaroi Basha në një dalje për mediat në përfundim të mbledhjes së Grupit Parlamentar demokrat.
Sipas Bashës, për dekriminalizimin nuk ka asnjë pengesë, përveç vullnetit politik dhe për mungesë të tij, kreu i demokratëve akuzoi drejtpërdrejtë Edi Ramën.
“PD ka këmbëngulur për miratimin sa më shpejt të akteve, ndërsa PS nuk ka lëvizur gishtin në këtë drejtim. Çdo vonesë në këtë drejtim ngarkon me përgjegjësi Edi Ramën dhe kupolën e tij. Pa zgjidhur çështjen e një njeriu që gjakos qytetarët e vet dhe më pas ulet në Parlament, nuk ka qetësi”, tha Basha.
Ndërkaq, grupi parlamentar i Partisë Socialiste ka bërë të ditur se Armando Prenga nuk është më deputet i kësaj partie pasi është përjashtuar menjëherë pas incidentit në Patok. /tesheshi.com/
