Ndërsa të huajt vijnë e ikin në Tiranë për të gjetur një zgjidhje për krizën politike që rrezikon të sjellë zgjedhje pa opozitën, kreu demokrat, Lulzim Basha nuk heziton të akuzojë sërish ndërkombëtarët. Në fjalimin e kësaj të mërkure nga çadra e protestës në bulevard, Basha sulmi ata që i cilësoi “zyrtarët e huaj të korruptuar në Tiranë”. Sipas tij këta zyrtarë “nuk kanë raportuar drogën dhe kriminelët në raportet e tyre”.
“Zyrtarët e huaj të korruptuar në Tiranë nuk kanë raportuar drogën dhe kriminelët. Nuk dalin dot nga rrethi vicioz ku e kanë futur veten e tyre sepse kanë mohuar krimin dhe janë bërë njësh me Edi Ramën për xhepat e tyre”, tha Basha.
Basha ka vijuar me akuzat ndaj Edi Ramës duke shpjeguar se projekti i kupolës që ai drejton, nuk është as demokracia e as drejtësia, por pasurimi.
“Një grusht kriminelësh e kthyen Shqipërinë në Kolumbinë e Europës. Kjo është vepra e rilindjes së krimit. Në planin e Edi Ramës, prishja e zgjedhjeve të ardhshme ka rëndësi jetike. Ndaj, gjithçka është bërë në funksion të kapjes së zgjedhjeve, duke diktuar një Parlament fasadë, mundësisht me ne si opozitë fasadë”, theksoi Basha. /tesheshi.com/
