PD duhet të jetë jo vetëm një alternativë politike, por morale dhe shpresëdhënëse për qytetarët. Kështu u shpreh kreu demokrat Lulzim Basha në mbledhjen e grupit parlamentar, një ditë përpara mbajtjes së seancës konstitutive të Kuvendit të Shqipërisë.
“Do të propozojmë zgjidhje në interes të publikut dhe do të denoncojmë qeverisjen e korrupsionit. Ne do të jemi alternativa e njerëzve, gjithmonë pranë tyre. Ne duhet të ngjallim shpresën dhe besimin e tyre te politika. Sistemi ynë politik nuk i jep opozitës asnjë pushtet real, ndërkohë që qeveria kontrollon të gjitha instrumentet madje edhe mediat”, tha Basha.
Ndërsa i uroi deputetëve të rinj një fillim të mbarë në misionin e tyre, Basha i uroi mirëseardhjen në botën e ashpër të politikës.
“Do ju fyejnë, do ju shajnë. Ju duhet të ruani dinjitetin dhe durimin. Puna juaj do të shpërblehet nesër, ju jeni njerëzit me përgjegjësinë më të madhe në PD. Uroj ta përmbushni me nder misionin tuaj”, theksoi Basha. /tesheshi.com/
