Kreu demokrat Basha, ka prezantuar të tjera raste që sipas tij paraqesin aktin kriminal të kryeministrit Rama me heqjen e ndihmës ekonomike ndaj një numri familjesh.
Ilustruar me foto, realizuar mjeshtërisht në paraqitjen dramatike të situatës, Basha kumtoi atë çfarë pa në Vorë, ku veçon vajzat që ushqehen me turshi e qepë.
“Mirela Luka nga Vora më tha se prej nje jave nuk e çon vajzën në shkollë prej kollës azmatike që i ushton pa pushuar.
Kjo nënë nuk ka para për ti blerë ilaçe vajzës së saj. Vetë ajo dhe i shoqi janë pa punë dhe pa asnjë të ardhur për të ushqyer 3 fëmijët e tyre, qëkur Rama ju hoqi ndihmën ekonomike.
Në barakën e Sabri Vrionit dy vajzat e tij 10 dhe 4 vjeç ushqehen me lakër turshi dhe qepë të njoma jashtë në të ftohtë sepse barakës së Sabriut ia kanë shkëputur energjinë prej muajsh. Edhe pse ishte e vetmja e ardhur, Rama ju ka hequr edhe ndihmën ekonomike.
Kryeministri i qejfeve dhe luksit nuk jep asnjë shpjegim pse u ka hequr bukën e fëmijëve mijëra familjeve në nevojë ekstreme, kur paratë e shqiptarëve i bën rrush e kumbulla me zyra, makina dhe orendi.
Në vend që t’u kthejë urgjentisht ndihmën ekonomike mijëra familjeve, ai vazhdon mashtrimet, gënjeshtrat dhe sulmon opozitën pse po tregon të vërtetën”, shkruan Basha në FB. /tesheshi.com/
