Kreu i opozitës, Lulzim Basha i ka ofruar opinionit rastin e një 31-vjeçari në Kamëz, që sipas tij, pamundësia për të paguar energjinë elektrike e çoi që t’i jepte fund vetes.
Me anë të një statusi në FB, Basha ka rrëfyer politikisht se çfarë i ndodhi shtetast Klajdi Muça dy ditë më parë:
“Ku kam mundësi unë të paguaj kaq para? Veç të vras veten…” Këto kanë qenë fjalët e fundit të 31-vjeçarit Klajdi Muça, në zyrën e OSHEE-së në Kamëz, që janë dëgjuar nga dhjetëra dëshmitarë mesditën e së hënës. Fatura që i duhej të paguante, në mënyrë që OSHEE-ja të mos i priste dritat, ishte 80 mijë lekë të rinj. Klajdi, babai i një fëmije të mitur, në pamundësi të sigurimit të shumës së parave i ka dhënë fund jetës duke u vetvarur. Kjo dramë e përsëritur këto vite për shkak të pamundësisë së pagesës së energjisë duhet të marrë fund! Ne nuk do të lemë asnjë familje në errësirë se nuk paguan dot energjinë. Deri në 200 kilovat energji për muaj do ta paguajë shteti për familjet në pamundësi ekonomike”, shkruan Basha.
“Buka, uji dhe dritat do të jenë të garantuara për çdo familje. Qytetari nuk do të jetë më i harruar dhe i braktisur në dëshpërim”, ka theksuar më tek kreu demokrat, një premtim që sapo vjen e shpeshtohet edhe me afrimin e zgjedhjeve.
Tre vjet më parë, qeveria Rama nisi një aksion për ndëshkimin e të gjithë atyre që vidhnin energjinë, si dhe për të mbledhur të gjitha detyrimet e prapambetuta në vite nga mospagesa. Aksioni u shoqërua dhe nga raste ekstreme të cilat opozita i shfrytëzoi për të denoncuar, sipas saj pashpirtësinë e qeverisë, ndaj shtresave në nevojë dhe të pamundurve. /tesheshi.com/
