Kreu i PD-së, Lulzim Basha nisi këtë të martë një tur bashkëbisedimi me anëtarësinë e partisë, si një fushata paraelektorale në parapërgatitje për zgjedhjet e ardhshme.
“Si do të fitojmë përballë bandave, parave të krimit, drogës dhe korrupsionit që ka grumbulluar Edi Rama?! Përgjigjja është vetëm një: aleanca me qytetarët dhe duke iu dhënë shpresë njerëzve se rotacioni nuk do të jetë thjesht largimi i disa njerëzve dhe zëvendësimi me disa të tjerë”, ka thënë Basha në të parin takim, duke promovuar kështu po të njëjtën frymë populiste, siç ndodhi me Ramën para se të lidhte aleancë me Metën kur deklarontë se “aleat kanë popullin”.
“Çelësi i fitores tonë nuk është dhe nuk mund të jetë kurrë përgjigjja e bandës me bandë. Forca jonë, forca e opozitës është qytetari shqiptar. Receta e opozitës është qytetari shqiptar dhe mrekullia e opozitës do të jetë qytetari shqiptar”, tha më tej kreu i opozitës. /tesheshi.com/
