Kreu demokrat Basha shprehu shqetësimin se kështu si po vepron qeveria me fasonët mund t’i çojë ata drejt mbylljes. Kujtojmë se qëndrimi i tij në fillimet e aplikimit të masave izoluese qe mbyllja e domosdoshme fasonerive, duke i konsideruar si vatra të rrezikshme infeksioni. Por tani, Basha është që ato të vijojnë punën.
“Sot bisedova me përfaqësuesit e Unionit të Fasonistëve të Shqipërisë, z.Gjergji Gjika dhe z. Florian Zekja mbi shqetësimet e tyre të mëdha për krizën.
Fasonët po përballen me probleme, nga rënia e prodhimit dhe e shitjeve tek mungesa e likuiditetit për të paguar detyrimet ndaj shtetit dhe pagat e punonjësve. Në vend të mbështetjes për të mbrojtur vendet e punës, qeveria ka shtuar kostot e tyre, duke rrezikuar mbijetesën e qindra ndërmarrjeve”, shkruan njeriu në krye të opozitës.
Basha shqetësohet nga fakti se protokollet e qeverisë janë të pazbatueshme, e kësisoj riskojnë në mbijetesën e këtij fronti të madh punësimi.
“Me ‘protokollin e kuq’ krejtësisht të pazbatueshëm, qeveria po i shtyn fasonët drejt mbylljes, pa patur detyrimin për ti mbështetur financiarisht punonjësit e tyre. Nëse fasonët falimentojnë, 70 mijë punonjës humbin vendin e punës. Kjo duhet parandaluar urgjentisht”, shkruan kreu demokrat. /tesheshi.com/
