I lënë krejtësisht në periferi të politikës së ditës, pa asnjë tregues se mund të rifaktorizohet sërish në kushtet e të mos qënit në krye të PD-së, Lulzim Basha vijon përpjekjen e tij të mundimshme për të thënë se “jam dhe unë këtu”.
Me jehonë pothuajse të shuar, ai vuan faktin se shqetësimet reale të shqiptarëve nuk gjejnë jehonën e duhur në debatin e përditshëm politik.
“Probleme që nuk gjejnë jehonë në hapësirën e përditshme të debatit publik, sepse çoroditja e organizuar nga propaganda e injektuar nga qeveria dhe patericat e saj në opozitë, vendos në qendër të vëmendjes hallet e politikanëve, jo shqetësimet e qytetarëve”, shkruan Basha në një status të fundit, pa mundur të jetë më në lajmet kryesore të politikës.
Ai ka themeluar një grupim që është dhe nuk është parti politike klasike – Demokratët Euroatlantikë. Por deri më tani nuk ka mundur të imponohet as ai e as përkrahësit e tij, të paktën për të qenë lajm.
Kështu, jashtë PD-së, ish-kreu disavjeçar i PD-së, thuajse është me mision të përfunduar politik. Sigurisht, pa lavdi. /tesheshi.com/
