Kreu demokrat Basha votoi për emrat kandidatë për deputetë të partisë së tij, një proces përzgjedhjeje që ai e cilëson si të parin në lloj në rajon.
“Ky proces është zhvilluar në gjithë Shqipërinë dhe kulmon në Tiranë. Pjesëmarrja është tregues i qartë i pjekurisë politike. Ndryshimi fillon nga vota. Falenderoj partnerët tanë ndërkombëtarë që na ndihmuan të hedhim këtë hap, një risi jo vetëm për ne por për rajonin, Demokracia nis nga brenda shtëpisë. Zëri dhe vota e anëtarëve të PD do të kenë rolin e tyre vendimtar për përcaktimin e përfaqësuesve të lartë të PD”, tha Basha.
Në një tjetër dalje për mediat, ai u shpreh i keqardhur ndaj qeverisë, e cila nuk ka marrë në konsideratë një paketë të tij me 5 pika, për tejkalimin e krizës COVID.
“Para dy javësh shpalosëm një plan me 5 pika për rimëkëmbjen. Që nga ajo ditë unë kam qenë në një tur në qytete të ndryshme dhe fshatra të Shqipërisë. Situata po përkeqësohet kriza po përkeqësohet. 100 mijë shqiptarë kanë humbur vendet e punës gjatë këtij viti. Qeveria nuk bën asgjë”, pretendoi Basha.
“Prandaj, Rama t’i vërë gishtin kokës, planin me 5 pika e ka gati, ta zbatojë…”, shtoi kreu demokrat. /tesheshi.com/
