Në një status në FB në kuadër të përvjetorit të fitores historike të PD-së mbi PP-në, duke shënuar rënien edhe me votë të regjimit punist, kryetari i një prej dy gjysmave të PD-së, Lulzim Basha, ka shmangur si foton historike të asaj dite, me Berishën në qendër, e si përmendjen e tij.
“32 vite më parë, Partia Demokratike e Shqipërisë arriti fitoren më të madhe në historinë e pluralizmit shqiptar.
Me SHBA-të në krah dhe me nevojën dhe dëshirën e popullit për t’u shkëputur nga e kaluara, ajo arriti të bëhet promotor i ndryshimit dhe mekanizëm i aspiratave të njerëzve”, shkruan ai.
Basha vijon më tej duke pohuar se “përtej kësaj fitoreje, arritjet më të mëdha të viteve të pluralizmit mbajnë firmën e PD-së”, por pa thënë konkretisht se për cilën arritje e ka fjalën.
“Sot sfida më e madhe e Partisë Demokratike të Shqipërisë ngelet rikthimi i besimit dhe shpresës së fillimeve, ku idealizmi dhe entuziazmi i atyre viteve ka nevojë të rindizet edhe një here”, shkruan Basha, dëshirë të cilën e ka dhe Berisha, por që as njëri e as tjetri nuk po arrijnë ta ndezin.
Kujtojmë se vetë Basha ka qenë adoleshent në ato kohë, pa u njohur nga askush, për t’u njohur vetëm në 2005-ën teksa u pa te emrat e portretet e KOP-it. /tesheshi.com/
