Ekipi i mjekëve të Infektivit, me në krye Dr. Najada Çomon, drejtuese kryesore e këtij spitali, ka reaguar ashpër ndaj pretendimeve të kreut demokrat Basha për “fshehje vdekjesh” COVID, duke ia mveshur këtë qeverisë, ndonëse akuza bie direkt mbi bluzat e bardha.
“Shprehim publikisht habinë tonë për akuzat e bëra dje nga kreu i PD-së Lulzim Basha në një emision televiziv.
Janë akuza tronditëse që vendosin në goditje profesionalizmin tonë si mjek por janë dhe goditje të befasishme të përpjekjeve tona më shumë se 9 mujore me COVID-19.
Nuk duhej kurrësesi të arrihej deri këtu dhe nuk është aspak dëshira jonë që të merremi me deklarata publike, por përballë akuzash të tilla e kemi të domosdoshme të informojmë opinionin publik si vijon: nuk është kurrësesi e vërtetë që janë fshehur vdekjet nga COVID-19 dhe themi me përgjegjësi të plotë që kjo jo vetëm është praktikisht dhe teorikisht e pamundur.
Çdo pacient që ndërron jetë, përcillet për në morg së bashku me kartelën shoqëruese. Kartela bashkëshoqëruese përmban dhe arsyen e vdekjes së qytetarit, firmosur dhe vulosur me përgjegjësi profesionale e ligjore nga mjeku që e ka trajtuar deri në momentin e fundit nga mjeku që ka konstatuar vdekjen e personit.
Shkaku i vdekjes së një pacienti në spital nuk mund të përcaktohet as nga politikanët as nga kushdo qoftë përveç mjekut përkatës“, tha Dr. Çomo në një deklaratë, në emër dhe të kolegëve të saj në Infektiv.
Në deklaratë paralajmërohet më tej se nëse vijon kjo lloj akuze, pra për vdekje të fshehura, atëherë fjalën do e ketë prokuroria.
“Bëj me dije se nëse akuza përsëritet, ne do ftojmë organet kompetente të hetojnë dhe bëjnë verifikimin e çdo kartele mjekësore. Nuk do ta lejojmë këtë pa një ballafaqim qoftë ligjor apo miqësor.
Duhet t’i jepet fund praktikës politike të lojës me vdekjen që ka sjell jo pak telashe në 30 vjet në jetën e bluzave të bardha.
Kjo dalje jashtë shinave të së vërtetës në një kohë si kjo janë tejet të rrezikshme. Deklaratat e figurave politike në këtë kohë duhet të jenë krejt të kundërta”, thuhet në mesazhin e Dr. Najada Çomos. /tesheshi.com/
