Kreu i PD-së, Lulzim Basha e ka mbajtur hapin e tij paraalektoral në Has. Atje, duke komunikuar me banorët, Basha u tha se hallet e tyre janë dhe të tijat si forcë politike.
“Jemi gati duke njohur hallet tuaja, duke i pranuar ato, duke pranuar edhe pjesën tonë të përgjegjësisë për sa na takon. Jemi gati, duke i kuptuar, duke i ndjerë si hallet tona e jo duke jetuar në një botë të veçuar nga hallet tuaja. Jemi gati sepse kemi zgjidhje, zgjidhje plotësisht të realizueshme, jo dëngla me shëndetësi falas dhe me premtime boshe që u përdorën vetëm për të marrë votat”, tha kreu demokrat.
Më pas, ai akuzoi qeverinë e Ramës për monopole në çdo sektor, madje dhe tek buka e përditshme e drutë e zjarrit
“Pse është thesi i miellit këtu dyfish më i shtrenjtë se përtej Qafës së Prusht?! Pse? Sepse ka monopole. Sepse Edi Rama ka vendosur që në Shqipërinë e 2016-s mielli, buka, sheqeri, vaji, nafta të mos tregtohen siç tregtohen kudo në botë, me rregullat e tregut të lirë, por t’ua jape një grusht njerëzish, një grusht njerëzish të kenë mundësinë dhe çdo kush tjetër që futet në treg ndëshkohet, penalizohet, me gjoba, me kontroll, me xhandar, me tatimor, me doganier”, tha Basha. /tesheshi.com/
