Një mesazh i fundit i kreut demokrat Basha, ka qenë jo për Ramën por për Brukselin; a më saktë për ndërkombëtarët në përgjithësi, të cilët nuk e mbështesin në aksionin e tij politik.
Një ditë pas protestës të së dielës, Basha e quan masën njerëzore në rrugë si “shqiptarë europianë”.
“Bashkimi popullor i 2 Qershorit është asambleja më madhështore e shqiptarëve europianë, të vjedhur, të dhunuar e të tradhëtuar, që kërkojnë zgjidhjen e krizës me largimin e shkaktarit të saj, qeveri tranzitore dhe zgjedhje të lira”.
Ngacmimi vijon ende, sërish me ndërkombëtarët, duke shkruar:
“Unë e di që çdo shqiptar lufton të ketë të njëjtat të drejta si çdo qytetar europian. Ne nuk kërkojmë asgjë më shumë, por nuk do të pranojmë asgjë më pak për veten se vlerat që na bashkojnë: demokraci, shtet ligjor dhe drejtësi të barabartë për të gjithë.
Ne nuk hedhim asnjë hap pas!”, përfundon mesazhi i Bashës.
Siç mund të vërehet, kreu demokrat po tenton t’u imponohet ndërkombëtarëve për t’u parë ndryshe prej tyre, e për të siguruar një mbështetje sado të vogël. /tesheshi.com/
