Duket e pabesueshme ajo që ka ndodhur sot në skenën politike shqiptare. Pas një tensionimi të skajshëm për shkak të protestës maratonike të opozitës nën “çadrën e saj të lirisë”, mazhoranca e fton në dialog dhe ajo i përgjigjet pa asnjë hezitim, duke paralajmëruar daljen nga çadra.
“Koalicioni opozitar, duke vlerësuar momentin kritik për Shqipërinë dhe shqiptarët për shkak të kërcënimit të zgjedhjeve dhe të votës së lirë dhe të ndershme nga krimi dhe droga me lidhje qeveritare, shpreh gatishmërinë për një tryezë dialogu të vërtetë dhe jo fasadë, me përfaqësuesit e partive të koalicionit qeveritar, me qëllim krijimin e kushteve për zgjedhje të lira e të ndershme, përmes një qeverie me mbështetje të gjerë politike, që do të garantojë: zbatimin e plotë të ligjit të dekriminalizimit, luftë efikase kundër narkotrafikut, krimit të organizuar dhe parave të drogës, përgatitjen e zgjedhjeve të lira e të ndershme dhe zbatimin e reformës në drejtësi, sipas përcaktimeve kushtetuese të 22 korrikut”, thuhet në deklaratën e PD-së.
Dhe kjo ndodh disa orë para mbërritjes në Tiranë të Frederica Mogherinit, kreut të diplomacisë së Brukselit. Me gjasë, gadishmëria e opozitës për dialog me mazhorancës, mund të sjellë dhe uljen e çadrës së protestës. Ajo që vihet re në deklaratën e saj, është heqja dorë nga kërkesa ultimative për qeveri teknike. /tesheshi.com/
