Kryeministri Rama u bëri thirrje grevistëve naftëtarë të Ballshit që të ndërpresin grevën e urisë ku janë futur prej ditësh, e mos shpresojnë se me ultimatume mund ta zgjidhin hallin e tyre të pagave të pamarra, jo nga shteti por nga privati
“U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja! Ne jemi plotësisht të ndjeshëm ndaj hallit të tyre që është edhe halli ynë dhe është absurde që hallin t’ua qajnë ata që ua shkaktuan!
I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu! Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm!”, shkruan Rama në Twitter.
Ky është reagimi më i plotë dhe më i drejtpëdrejtë i shefit të qeverisë për atë çfarë ndodh në Ballsh, ku dhjetra naftëtarë pretesojnë prej javësh, e prej ditësh janë futur në grevë urie.
Ata i drejtohen qeverisë për hallin e pagave të tyre të prapambetura, por kjo e fundit thotë se nuk mund të ndërhyjë në një marrëdhënie private.
Sipas saj, tatpjeta e rafinerisë së Balshit nisi që me privatizimin e saj abuziv nën qeverisjen e PD. Këto sot, janë pasojat e atij privatizimi. /tesheshi.com/
