Ndryshe nga bashkëkartiakët e tij, kreu i PD-së, Lulzim Basha nuk është marrë me zërat e rëndësishëm ndërkombëtarë që u deklaruan kundër protestës gjatë orëve të drekës, Knut Fleckenstein dhe Johanes Hahn. Gjatë mbrëmjes ai sërish foli nga çadra duke përsëritur të njëjtat mesazhe.
“Së bashku po hedhim themelet e një Shqipërie tjetër, e një republike tjetër e cila nuk do të ketë asgjë të përbashkët me republikën që do të përmbysim, republikën e korrupsionit dhe drogës, ku një grusht oligarkësh kanë shtënë në dorë gjithë pushtetin”, tha kreu demokrat.
Sipas tij, është pikërisht protesta e opozitës ajo që do e ndryshojë Shqipërinë.
“Ajo do të ndryshojë rrënjësisht. Nuk do të lejojmë më parlament pazaresh, prapa të cilit fshihet korrupsioni. Kurrë më nuk do të pranojmë një republikë të kalbur në themele”.
Për Bashën, qeveria teknike – që është pra dhe kushti kryesor i protestës – është vetëm “stacioni i parë” i kësaj lëvizjeje të opozitës.
“Ne jemi të vendosur për ta hedhur nga themelet këtë qeveri të kalbur e të korruptuar. Ne nuk tërhiqemi deri në fitore. Ne kemi një model europian dhe ju mos kërkoni asgjë më pak se ky model. Shqipëria që po vjen është Shqipëria juaj dhe do të jetë në duart tuaja. Asgjë nuk do të jetë më si më parë”, u ka thënë Basha të rinjve të pranishëm.
Fjalët e Bashës i adresoheshin një grupi të rinjsh që u futën në çadër orët e mbrëmjes. /tesheshi.com/
