Kreu i opozitës shqiptare, Lulzim Basha nuk është mjaftuar që thjesht të denoncojnë politikisht përhapjen në masë të kultivimit dhe trafikimit të drogës, por ka bërë dhe moralistin kur ka deklamuar se “droga po shkatërron shoqërinë”, duke marrë shkas edhe një vrasje e fundit brenda gjakut në Dukagjin të Shkodrës për shkak të kanabisit, Basha tha:
“Një 31-vjeçar u ekzekutua para pak ditësh në Dukagjin, i vrarë nga dy të afërm. Arsyeja: konfliktet për kanabisin. Është viktima e pestë gjatë këtyre muajve për shkak të drogës. Fatkeqësisht, spiralja e përgjakshme e krimit vetëm sa ka filluar dhe do të shtohet. Shkatërrim të jetës, të shoqërisë dhe të pasurive të vendit. Kështu ka ndodhur kudo në botë, kështu po ndodh edhe në Shqipëri. Droga po vret, madje nuk po kursen as brenda familjes. Droga po shkatërron burimet natyrore të vendit, duke i vënë të gjitha në dispozicion të trafikanteve. Droga po shkatërron shoqërinë, duke i kthyer njerëzit e zakonshëm, madje edhe fëmijët, në shkelës të ligjit dhe në kriminelë”, tha Basha, që më pas kaloi direct në planin politik:
“Droga po shkatërron procesin politik. Sikurse u pa në Dibër, tashmë edhe zgjedhjet i vendosin kriminelët. Edi Rama dhe qeverisja e tij i ka vënë shqiptarët para dy alternativave: ose të vihen në shërbim të kriminelëve të drogës, ose të emigrojnë. Edi Rama vetë është me kriminelët. Ai iu ka dhënë atyre lirinë dhe fuqinë që ta kthejnë Shqipërinë në pronë të krimit, mjaft që t’i shërbejnë atij me para dhe vota. Në këtë situatë ne duhet të bëhemi të gjithë bashkë për t’i bërë rezistencë krimit dhe për të ndalur rrënimin e vendit. Shqipëria do të shuhet nëse e lëmë në dorë të krimit. Shqipëria nuk ka të ardhme me Edi Ramën. Shqipëria më mirë pa Edi Ramën”, ka shtuar kreu demokrat.
Por ky është i pari rast që Basha denoncon fort praninë e drogës në jetën shqiptare, ndërkohë që gjatë qeverisjes së tij, ku ai ka qënë edhe ministër Rendi, kjo narrativë anti-kanabis që kishte për simbol “Lazaratin-demokrat” ka munguar tërësisht, e po ashtu ndonjë aksion i përbetuar anti-drogë. /tesheshi.com/
