Kreu i Partisë Demokratike, Lulzim Basha, ka folur ditën e djeshme për listat e vetëdeklarimeve të deputetëve, ndërsa ka akuzuar edhe një herë kryeministrin Edi Rama si krijues të një perandorie krimi në vend.
“Edvini deri në 2002, apo Edi prej atij viti e këtej, duhej të kërkonte falje publikisht sot që doli në sytë e shqiptarëve se si ai ka zgjedhur me dorën e tij deputetë e kryetarë bashkie, që megjithëse kanë ndërruar disa emra, në secilin prej tyre kanë një krim”, – shkruan Basha në reagimin e tij në Facebook.
Sipas tij, nëse Rama nuk e ka këtë minimum integriteti, të paktën sot të fshihej, të mbyllte gojën.
“Nëse janë fjala vjen 18, ai del i pastër. Po Frrokun vrasës, e quan? Po Ndokën tutor e rrëmbyes, e quan? Hoqi nga lista dy gra për ta bërë deputet. Po Mondin e gjakderdhjes në derë të komisariatit, kush e bëri deputet? Apo e njeh për Armando. Të mos shkojmë tek Bushi e Roshi që nuk u dilte formulari për të treguar sa herë janë ndaluar nga policitë europiane për krime e drogë. Apo Tur Bardhi që edhe pse ka deklaruar plot 4 emra ka lënë edhe 2 emra pa deklaruar e ndaj e pret ndjekja penale dhe largimi njësoj”, – janë fjalët e kryedemokratit.
Ai shton më tej se ka shume prej banditëve të Ramës që kanë fshehur të dhënat, po PD bashkë me qytetarët do t’i gjejnë e do ta pastrojmë politikën nga kriminelet.
“Po me të vërtetë ky është fillimi. Fillimi i fundit për Perandorinë e Krimit që ngriti në pushtet me dorën e tij Edi(vini)”, – përfundon shkrimin e tij Lulzim Basha. /tesheshi.com/
