Mbledhja e grupit parlamentar të Partisë Demokratike është shoqëruar si zakonisht me fjalën e kryetarit Basha.
Pas një panorame të zakonshme të situatës aktuale në vend, Basha ka risjellë dhe njëherë në vëmendje aferën e CEZ-it, duke deklaruar se Rama e Meta u pajtuan për t’i shpëtuar drejtësinë e për t’i zgjatur jetën pushtetit të tyre. Qeverisjen e tyre ai e përshkroi si të kalbëzuar, duke mos votuar për hetimin e çështjes së CEZ-it.
“Rama,” do të deklaronte Basha, “iu ul në gjunjë Metës, pasi ky i fundit e kërcënoi se do t’i nxirrte të palarat.”
“I ashtuquajturi pajtim mes Ramës dhe Metës për skandalin e CEZ-it është pajtim për të zezën e shqiptarëve, është marrëveshje bashkëfajtorësh për të shtrydhur pushtetin, për të përfituar dhe për t’u pasuruar përmes pushtetit.”
Basha e akuzoi shumicën se javën e shkuar e rrëzoi me kartona kërkesën e opozitës për futjen e çështjes së CEZ-it në rend të ditës me procedurë të përshpejtuar, duke deklaruar se PD-ja nuk do ta lejojë mbylljen e skandalit.
Ai u kujtoi qytetarëve të ngrihen në këmbë, si zgjidhja e vetme për të shpëtuar nga e keqja e këtij pushteti.
