Kapja gjysmë ton kokainë, po shërbën për opozitën si një “lëndë e shtuar luftarake” karshi mazhorancës qeverisëse. Kreu Basha as që e sheh kapjen e sasisë së madhe si “sukses qeveritar”, përkundrazi.
“Kjo qeverisje e ka kthyer Shqipërinë në një bazë të krimit të organizuar në të gjithë Europën. Një strehë të sigurt të krimit të organizuar për të gjithë Europën. Natyrisht, si në rastin e Xibrakës, edhe në këtë rast është arrestuar shoferi, por jo bosët, aq më pak peshqit e mëdhenj dhe nuk mund të arrestohen për sa kohë që në krye të qeverisjes është Edi Rama”, tha Basha.
Ndërkohë, kreu i opozitës i është rikthyer akuzës së harruar tashmë, asaj që doli nga fjalori demokrat qyshse Rama iku drejtimi i Tiranës, si Bashki që lan paratë e pista – kuptohet, nën drejtimin e Erion Velisë.
“Paratë e përfituara nga trafiku kriminal i drogës, janë një kërcënim i jashtëzakonshëm për stabilitetin politik dhe ekonomik të vendit. Së pari në bashkinë e Tiranës që është lavatricja kryesore e pastrimit të parave të drogës por dhe e të gjithë sektorëve të tjerë ku po pastrohen miliona euro”, theksoi kryedemokrati. /tesheshi.com/
