Kreu demokrat Basha e ka betonuar dhe njëherë qëndrimin e tij, tashmë dhe me kontestime nga brenda kampit opozitar, se ai nuk do pranojë të ulet me Ramën.
“Nuk ka kthim pas. Nuk ka ulje në tavolinë me Edi Ramën, me njeriun që vjedh zgjedhjet. Synimi ynë është largimi i tij, është qeveria tranzitore, është krijimi i kushteve për zgjedhje të lira e të ndershme. Do të vazhdojmë aksionin politik, do të vazhdojmë protestat, nuk do të pranojmë kurrë dhunën shtetërore dhe uzurpimin e dhunshëm të pushtetit”, theksoi Basha në një takim me demokratët e Divjakës.
Basha shtoi se zgjidhja e krizës vjen edhe me ndëshkimin e atyre që kanë prekur zgjedhjet, duke aluduar në disa emra të mazhorancës.
“Kjo krizë nuk mbyllet me pazar. Kriza zgjidhet me parime. Parimi i parë është prangat për ata politikanë që kanë vjedhur votat. Për këtë duhet drejtësi e pavarur, por drejtësi me Ramën kryeministër nuk ka për të patur”, shtoi kreu demokrat. /tesheshi.com/
