Lulzim Basha dhe Eduard Selami janë përplasur në degën e Elbasanit, një zonë ku konkurenti për postin e kryetarit të PD-së e ka mbuluar si deputet në legjislaturën e kaluar por edhe në të shkuarën si përfaqësues i Librazhdit.
Takimet kanë qenë të ndara dhe Selami e ka akuzuar Bashën se nuk ka respektuar paktin se ata të dy do të bënin një përballje të përbashkët me miltantët e PD-së.
“Unë e pata fjalën e zotit Basha që këto do të ishin takime të hapura, dhe të ishim të dy përballë jush dhe të shpalosnim platformën tonë dhe ti bënim pyetje njëri-tjetrit edhe me mediat këtu, dhe gjithkush të marrë atë që i takon, ballë për ballë. Z. Basha iu largua debatit. Unë mendoj që kjo nuk është e drejtë dhe i bëj thirrje se akoma ka kohë. Hajde, prej këtej e tutje t’i bëjmë debatet të hapura përpara kamerave, ta shikojmë se ku kemi gabuar. T’ia them në sy se ku e humbi besimin tim”, tha Selami.
Selami shkoi larg në akuzën e tij kur siluroi kryetarin e “ngrirë” se mendon më shumë të ruajë karrigen e tij si kryetar sesa për rimëkëmbjen e demokratëve.
“Në mënyrë fare të natyrshme ngrihet një pyetje: Kush është qëllimi dhe interesi kryesor i z.Basha? Rimëkëmbja e Partisë Demokratike apo mbajtja dhe ruajtja e postit të kryetarit? Kam frikë se është një pyetje që në mënyrë të sinqertë z.Basha nuk i pergjigjet dot” – tha Selami, i cili premtoi një rithemelim të PD-së.
Ndërkohë, Lulzim Basha, i cili zhvilloi një takim të ndarë me strukturat e Elbasanit, e fokusoi fjalimin e tij në sukseset sipas tij të arritura në mandatin e parë si shef i opozitës.
“25 Qershori provoi se kauzat tona të dekriminalizimit, të luftës kundër drogës dhe të zgjedhjeve të lira dhe të ndershme janë kauzat më jetike për Shqipërinë sot. Nuk kishte zgjedhje të lira dhe të ndershme me 25 Qershor. Nuk foli vullneti i qytetarëve. Ai u tjetërsua përmes shtrembërimit e blerjes masive të votës nga një qeveri e bërë njish me krimin dhe krimi i bërë njish me qeverisjen, me të cilët Shqipëria nuk ka e nuk do të ketë asnjë të ardhme. Plani ynë për një qeveri të qytetarëve parashikon që shqiptarët të kenë mundësi të jetojnë në shtëpitë e tyre pa qënë nevoja të shkojnë emigrantë. Të kenë mundësi për punësim. Të mos kenë frikë nga të fortët, nga të pushtetshmit dhe të zgjedhin lirisht qeverisjen që meritojnë në nivel qendror dhe lokal. Kjo mazhorancë është një mazhorancë fiktive. Prodhim jo i shpresës, as i vizionit për të nesërmen por i dëshpërimit, i frikës që mbollën dhe thelluan. Njësoj si në 1991 nuk ka se çfarë t’u ofrojë shqiptarëve. Ekonominë e kanë në kolaps. Arkën e shtetin e kanë në kolaps. Qeverinë e ka ilegjitime pa votën e shqiptarëve. E dimë ne, e dinë shqiptarët. E di edhe ai dhe e dinë edhe socialistët”, tha Basha.
Kryetari i PD-së sërish e ka injoruar rivalin e tij, duke devijuar debatin apo përballjen për çështjet e riorganizimit të PD-së.
Basha është fokusuar në strategjinë se opozita i ka pasur të gjitha qëndrimet në unision me qytetarët por humbja ka ardhur si pasojë e inxhinierimit të votës nga qeveria.
Por këtu duket se ka një fakt që nuk i vjen në ndihmë, marrëveshja me Ramën dhe ministrant teknikë, të cilët jo vetëm qëndruan në punë të gjithë procesin zgjedhor por edhe sot që jemi gati një muaj pas ata nuk largohen.
Megjithatë debati më i madh brenda PD-së është për trupën e votuesve të anëtarësisë, për të cilët edhe Selami që është kandidat zyrtar, por edhe Astrit Patozi që është një rival jo de jure, akuzojnë Bashën për manipulime.
Basha duket afër fitores më 22 korrik por PD rrezikohet të përballet me një debat të ashpër pas garës, ç’ka mund të rrezikojë përçarjen e saj. /tesheshi.com/
