Opozita ka një plan rezervë për protestën e nesërme. Mësohet se Lulzim Basha do të shpallë në mbrëmje nisjen e një vale protestash të disa formave.
Skenari ende nuk i është treguar as aleatëve, por dihet vetëm nga Lulzim Basha dhe Monika Kryemadhi të cilët kanë koordinuar gjithçka për planin.
Krerët e dy partive më të mëdha opozitare kanë deklaruar se kjo protestë do të flasë përmes pjesëmarrjes së madhe të qytetarëve.
Për ta arritur këtë ka pasur një angazhim të të gjithë strukturave partiake, në qendër dhe në rrethe.
Protesta do të ketë tre itinerare lëvizjesh, që do të shkojnë drejt Kryeministrisë në formë marshimi.
Anëtarët, militantët dhe qytetarët që do të vijnë nga qytetet do të kenë pikëtakim tek sheshi “Skënderbej”, në pritje të marshimit që do të nisë nga selia e Partisë Demokratike, nga ku do të dalë Lulzim Basha.
Kreu i opozitës, sipas planit të përgatitur, do të dalë nga selia blu dhe do të ecë përgjatë bulevardit “Zhan Dark”, për të mbërritur tek godina e Hotel Dajtit, së bashku me njerëzit që do e shoqërojnë dhe me pankartat.
Tek kjo godinë, Basha do i bashkohet qytetarëve që do të vijnë nga sheshi “Skënderbej”, për të marshuar më pas së bashku drejt Kryeministrisë.
Një tjetër itinerar do të jetë nga selia e Lëvizjes Socialiste për Integrim.
Njësoj si PD edhe anëtarët e Lëvizjes Socialiste për Integrim pikëtakimin do e kenë në sheshin ‘Skënderbej’, ndërsa kryetarja e LSI-së, Monika Kryemadhi do të vijë nga selia, për t’iu bashkuar protestuesve.
Qytetarët nga rrethet do të vijnë me autobusë, të cilët do të kenë pikëmbërritje të ndryshme, larg qendrës së kryeqytetit, por ata do të do të mblidhen tek sheshi “Skënderbej”, për marshimin rreth orës 12 drejt Kryeministrisë.
Sipas planit fillestar, kjo protestë është parashikuar të zgjasë 3-4 orë, me një fjalim përmbyllës nga Basha.
Kreu i opozitës Lulzim Basha ka shmangur pyetjet se çfarë do të ndodh më 28 janar, ndërsa është paralajmëruar valë protestash në javët në vijim. Opozita nëpërmjet protestës kërkon largimin e qeverisë “Rama” dhe krijimin e një qeverie tjetër./tesheshi.com/
