Jo prezent në nisjen e stërvitjes së madhe ushtarake të NATO-s në Shqipëri dhe në orët e vështira të post-humbjes në zgjedhje, kreu i opozitës Lulzim Basha bëri një deklaratë të çuditshme këtë të martë. Ai përmendi “despotë Ballkani”, me aludime të qarta politike, por që nuk janë pjesë e ligjërimit ndërkombëtar.
“Së pari dua të falënderoj nga zemra forcat pjesëmarrëse të NATO, në veçanti ato të SHBA-vë në një stërvitje historike, ‘Defender Europe 21’.
Shpreh krenarinë legjitime që PD, qeverisja jonë dhe unë në rolin tim si ministër i Jashtëm mundësuam anëtarësimin në aleancën më të madhe politike dhe ushtarake të botës, NATO-n”, tha Basha në një deklaratë për media, duke tentuar të mos mungojë me qëndrime mbi atë që ndodhte pak kilometra më tutje, në Portin e Durrësit.
“Do t’i tregojë të gjithë rivalëve potencialë të aleancës të Atlantikut të Veriut se aleanca është e gatshme të përballet me çdo agresion sepse vlerat mbi të cilat në bashkohemi janë të pacenueshme si liria, demokracia, respektimi i kufijve dhe integritetit territoriale në veçanti atë të Kosovës.
Le të jetë ky një paralajmërim për despotët e Ballkanit. NATO nuk është një aleancë ushtarako-politike por politiko-ushtarake në bazë të cilin qëndron respektimi ligjit dhe demokracia e zgjedhjet e lira”, tha kreu i opozitës. /tesheshi.com/
