Në një status jopolitik, kreu demokrat Basha shkroi se teksa kishte dalë për pazar, kish vënë re respektimin e distancimit social nga qytetarët.
“Të dashur bashkëqytetarë, si shumë prej jush sot dola për disa blerje dhe pashë me kënaqësi respektimin e rregullave te distancimit social.
Ndonëse është një ditë e bukur pranvere, nuk duhet të harrojmë që jemi në kushtet e emergjencës dhe karantinës”, shkruan nr.1 i opozitës.
Ai këshillon që masat të respektohen, sidomos ajo e të qënit në distancë nga njëri-tjetrin.
“Ndaj dua t’ju përsëris sërish thirrjen time të respektoni të gjitha udhëzimet mbi distancimin social, sidomos kur jeni jashtë për nevojat e ditës! Ruani me fanatizëm distancën 1,5 metër!
E di që për shumë prej jush po bëhet e vështirë, por ju lutem mendoni se në këtë mënyrë po ruani veten, familjen dhe të afërmit tuaj.
Çdo ditë sakrificë për të ruajtur jetën dhe shëndetin është një betejë e fituar. Bashkë do tia dalim”, shkruan njeriu që udhëheq opozitën.
Ky është i pari status i Bashës pas ditësh këmbëngulje për teste masive, por dhe akuza për mosbërje të tyre deri dhe fshehje shifrash, pa përmbajtësi politike.
Një ditë më parë, Komiteti Teknik i Emergjencave, ndonëse jo drejtpërdrejt, i kthehu përgjigje në lidhje me strategjinë e testeve, duke sqaruar se si funksionin ajo. /tesheshi.com/
